النزله المعويه من الالف للياء
😩😩😩*ابنك عنده اسهال؟؟
طب عرفتي ازااااي !!!؟
-عديتي عدد مرات الحمام بتاعه كان اكتر من ٣ مرات وفي كل مره كان سايل وكميه
-او كان زايد عن عدد مراته الطبيعه وبرده سايل
_ او نازل منه وفيه مخاط او دم
كده يبقي اسهال وش
عايزه تعرفي اسبابه؟؟؟
بصيتي علي شكل الاستول
- زي الميه ومن غير ريحه ( فيروسي -روتا فيروس)
- زي الميه بس ماسك نفسه شويه وريحته وحشه (يع)
😁 ( بكتيري)-نازل فيه دم او مخاط او الاتنين مع بعض وبرده ريحته وحشه
(طفيلي) ...دوسنتاريا
** ممكن يكون يكون معاهم حراره وممكن لا
ممكن يكون معاهم ترجيع وممكن لا
طب والحل ؟؟
-اول حاجه محلول الجفاف ...لان الاسهال دا رد فعل لميكروب او فيروس وخروجه شيئ صحي ودورنا نعوضه اللي بيفقده مع الاسهال ونحميه من الجفاف
عن طريق محلول معالجة الجفاف زي hydrosafe
بنحل الكيس في ٢٠٠ مل ماء سبق غليه وبعد كل مره اسهال بندي للطفل ملعقه منه كل دقيقه... ٥٠ مل للمره (فنجان تقريبا)
ولو مقبلوش نحطه في التلاجه شويه طعمه بيبقي افضل للطفل
-طب ينفع نحطه في ببرونه؟؟
لأ طبعا بلاش استسهال
قيمة المحلول في انه يمتص ببطئ..ركزي
*تعرفوا ان فيه مدرسه في الطب بتفضل عدم علاج الاسهال بمضادات الاسهال وبتقول ان دورنا الوحيد اننا نعوض الطفل بمحلول معالجة الجفاف فقط...
اه والله زيمبؤلك كده
😧طب ايه هي درجات الجفاف؟؟
الاولي- لهفه علي شرب الميه
الثانيه-العين بدأت تدخل لجوا(عين غائره) والطفل عصبي
الثالثة-غياب الوعي لاقدر الله
علاج درجات الجفاف؟؟
*الاولي في البيت بمحلول المعالجه فقط
*الثانيه في البيت بالمحلول او مستشفي بالمحاليل الوريديه علي حسب حالة الطفل العامه
*الثالثه مستشفي طبعا
طب ونوصل لكده لييييه... ان شاء الله الامهات كلها واعيه لاولادها ومش هنوصل لكده اساسا..
👍👍علاج النزله
** فيروسي :
محلول الجفاف فقط بس لو معاه ترجيع ومش مستجيب لمضادات القئ او الاسهال اوووفر والطفل غير مستجيب لمحلول الجفاف لازم محاليل وريديه في المستشفي للاسف..
**بكتيري:
محلول الجفاف ومضاد حيوي يحدده الطبيب المعالج ويفضل لو عملنا تحليل براز ومزرعة براز من الاول
**طفيلي
اميبا او جارديا ...فلاجيل ١٠ ايام او نانازوكسيد واخواته
٣ ايام اللي اثبت فاعليته مؤخرا...وطبعا مع محلول الجفاف
**اكل الطفل
-الارز او سيرلاك الارز
-مكرونه مسلوقه بدون اي اضافات
-شوربة خضار
- الجزر المسلوق
-البطاطس المسلوقه
-شاي خفيف مع بسكويت ساده
-فيه اكلات جاهزه زي
Caroz
rizini
milupa special formula
-الطفل اللي بيرضع طبيعي يكمل رضاعته عادي جدا
ولو بيرضع صناعي والاسهال استمر اكتر من اسبوع بنغير نوع اللبن للبن خالي من اللاكتيلوز زي
Beblac fl. Aptamil fl
ولو مفيش مقدره بنقلل كمية البودر ونزود الميه
يعني لو بنحط ٤ مكيال علي ١٢٠ سم ميع
نخليه ٣ مكيال علي ١٢٠ سم
في فترة الاسهال فقط وبعد التحسن نرجع المقادير زي الاول
** اللجوء للمحاليل الوريديه بيكون في حالة وجود ترجيع وعدم استجابته لمضادات القئ واحسنهم
Zofran
Danset
Emerst
او كمية الاسهال اووووفر والطفل مش مستجيب لمحلول الجفاف وبدأت حالته تتدهور
😢***ادوية الاسهال الجيده
انتينال واخواته
دياكان مركب
استربتوكين
نبعد عن الانتوسيد والكابكت(pectin&kaloin) لانهم بيمتصوا السموم وللاسف بيفضلوا في الجسم فتلاقي الطفل بيتحسن تحسن وهمي ولكن في اقرب وقت يجيله انتكاسه قويه والاسهال ياخد وقت طويل معاه
** السلفوزنك فعلا فعلا بيحمي من النزلات المتكرره وجرعته ٥ سم لمدة ١٠ ايام
** الحمايه
-تطعيم الروتا مهم جدا جدا وتمنه لا يساوي ان الطفل يتحجز في المستشفي
- نظافة اشياء الطفل وبالاخص في فترة التسنين ( كل حاجه بتلاقيها علي بقه)
- الابتعاد عن المواد الحافظه واكل التيك اواي
- التخلص من البامبرز بعد الحمام لانه مصدر للعدوي وبالاخص الفيروسيه
**في اوروبا والدول المتقدمه بيعملوا تحليل براز ومزرعه وتحليل خاص للروتا وبيعرفوا سببه من البدايه وبيتعاملوا معاه...تخيلوا
والتحاليل دي طبعا موجوده عندنا بس مش كل الناس تقدر تعملها
تحويل كودإخفاء محول الأكواد الإبتساماتإخفاء