يلا كل مامي جديدة عندها نونو صغنتوت او على وشك تجمع هنا .. طلعي يلا ورقتك و اكتبي ورايا كل حاجه هقولها دلوقتي عشان تنفذيها و تتطمني على طفلك
0.اي طفل حديث الولادة لازم نطمن ع قلبه . لو فيه صوت مسموع او شك بوجود صوت ضرووووووري يتعمل اشعة ايكو ع القلب . مبقناش نطمن بالسماعة وبس . معدل العيوب الخلقية ف القلب انتشرت جدا جدا جدا . ومش اي حد يعمل الايكو لازم يكون متخصص في الاطفال و سمعته مشهورة و اطباء الاطفال بتثق فيه . دي حاجه مهمة جدا جدا جدا يا جماعة
1.اعرفي وزن طفلك اول ما يتولد . لان ده بيساعدنا كتير في تقييم الرضاعة
2.الرضاعة الصناعي مش ذنب انتي سبب فيه . متحمليش نفسك ذنب ملكيش اي دعوة بيه
3.طفلك في اول 24 ساعة بياخد حقنة تطعيم التهاب كيدي فيروسي ب . ممكن ياخدها كحد اقصى 3 ايام م يوم الولادة و ان كان يفضل في اول 24 ساعة
4. متديش طفلك سوايل دافية الا نادرا و اكتفي بصدرك طول الوقت . اللبن بياخد وقت ع ما ينزل
5. خدي هيربانا قرصين 3 مرات يوميا مع دوا مون هرب لاكت بواكي اتنين باكو 3 مرات يوميا مع دوا بنتافيت بواكي باكو يوميا . استمري عليهم اول 14 يوم خصوصا لو والده قيصري عشان يساعدوا ف ادرار اللبن
6. الطفل لو محتاج حضانة متتاخريش و احجزيه . ساعتها ده مش اختيار ده ضرورة عشان ننقذه .
7. لو طفلك ظهرت عليه الصفرا في اول 48 ساعة اكشفي عليه ف ساعتها لانها بتبقى صفرا مش فسيولوجية في الاغلب
8. الصفرا لو جت لطفلك من اليوم التالت غالبا فسيولوجية بس متروحيش لدكتور م غير ما يقيس نسبتها . اوعي متكشفيش عليها عشان بنشوف حالات كتير متاخرة بسبب كده للاسف
9. قياس و متابعة نسبة الصفرا الفسيولوجية عامة بيبقى ف اليوم التالت او الرابع و في اليوم السابع و في اليوم العاشر
10. طفلك لازم يعمل حمام براز ستول اسود اول 3 ايام . لو معملش خلال 48 ساعة اكشفي عليه فورا .
11. السرة ممكن تتاخر ف الوقوع فمتقلقيش خصوصا لو الطفل عنده صفرا . بس تابعي مع دكتورك برضو
12. بعد الولادة خدي فيتاميناتك اللي كنتي بتاخديها ايام الحمل . انصح بمامي فيتال باكو يوميا او فيريترون قرص يوميا او كالسيترون قرص يوميا .
13. متابعة وزن الطفل و نموه و صحته بتكون مرتين اسبوعيا اول شهرين . متكسليش
14. تطعيم الدرن و عينة الكعب لو نزفوا بشكل ملحوظ و غريب اكشفي ع طفلك فورا
15. تطعيم الدرن ممكن يتاخد في اول شهر من العمر و ممكن يتاجل للاربعين . مبنصحش يتاخد و نسبة الصفرا عالية شوية فحاولي تديه و نسبة الصفرا بتقل
16. حقنة الدرن بتعمل زي التهاب مكانها بعد ما تتاخد بشهرين تقريبا . لو حصل كده متقلقيش
17.حقنة الدرن لازم تسيب علامة . لو عدا 6 شهور و مسبتش علامة اكشفي و اعملي اختبار الدرن عشان ممكن ياخد التطعيم تاني
18. لو الطفل وزنه مبيزدش بالرضاعة الطبيعي متكابريش و دخلي الصناعي بتعليمات الطبيب
19. لازم اي طفل مولود يتقاسله محيط الراس و الطول في اول زيارة للطبيب. تابعس القياسات دي مرة كل 3 ل 6 شهور
20. متشربيش طفلك و متاكليهوش الا لما يدخل ف 6 شهور و انصح بتاجيل ده لبعد ما يتمهم
21. الكحل مش دستور يعني . بلاش العادة دي و النبي ملهاش لازمة و بتعملنا مشاكل
22. لو شكيتي في حول اكشفي رمد ع طول متتاخريش . خلينا نطمن
23. حساسية الالبان موجودة و منتشرة . لو شكيتي ف كده اكشفي بسرعة
24. ادي طفلك في دروب 4 نقط مرة يوميا من اول يوم ولادة لحد سن سنة . اجليه لو بياخد فيتامينات عشان الصفرا لحد الصفرا ما تروح
25. لو الطفل ولد لازم تطمني ع نزول الخصيتين ف مكانهم ف اول كشف ع الطبيب . ولو مش ظاهرين ف مكانهم اعملي سونار اطمني عليهم .
26. لو الطفل ولد لازم تستبعدي وجود الفتق الاربي . لو شكيتي ف اي وقت بوجوده زي انتفاخ الخصية او الاتنين خصوصا مع البكاء او ظهور لون ازرق غريب فيها اكشفي برضو و اعملي سونار
27. الطهارة لاطفالنا الذكور تتعمل من اول لحظة ولادة لحد السبوع بتاعه . لو عنده صفرا اجليها لحد عمر 40 يوم.
28. القشرة اللي ف راس ابنك و بنتك دي مش لعبة و النبي . بلاش تشيلوها باي حاجه هي هتروح لوحدها . هتشيلوها هتضروا شعره لانها بتطلع بخصل م شعره و ممكن تعمل التهابات مكانها ده غير انها بترجع اشد م الاول
29. من سن شهرين تابعي مرة شهريا مع دكتورك لحد سن 6 شهور
30. الطفل بيبدا يصلب راسه م سن 4 شهور . لو محصلش اكشفي عليه
31. من سن 3 شهور لثة طفلك بتبدا في مرحلة تكوين السنان . متقلقيش لو ريل او عض كتير ده طبيعي
32. الكافيين ممنوع اول 6 شهور لو بترضعي طبيعي
33. الدايت مينفعش قبل عمر 3 شهور . و منصحش بيه ف اول 6 شهور بصراحة
34. لو عندك بوادر اكتئاب ما بعد الحمل متخديش موانع حمل هرمونية خالص لانها هتزود الاكتئاب جدا . استخدمي اللولب افضل بعد استشارة طبيب النسا اكيد
35.لبوس الجلسرين طفلك مبيتعودش عليه . و المصحف مش ادمان
36. طفلك مناعته ضعيفة . احميه م العدوى و ابعديه ع اي حد تعبان و متتكسفيش
37. الانتفاخ الشديد ممكن يستمر 40 يوم .. شهر و نص .. انما شهرين متواصل كده فيه حاجه غلط . نشك ف حساسية البان ساعتها
38.راجعي البوم ادوية الصيدلية عشان هتنفعك كتيييييير
39. فتحة راس طفلك متقفلش قبل عمر 6 شهور . لو حسيتيها مش طبيعية او بتقفل بدري اكشفي عليه بسرعة
40. طعمي طفلك التطعيمات الاضافية اللي هي الروتا عشان ميجيلوش نزلة معوية و مكورات رئوية عشان ميجلوش التهاب ف المخ او التهاب شعبي او رئوي . عارف ان اسعارها غالية بس هي شيء ضروري بصراحة . الحالات اللي جاية ضروري تتطعم بغض النظر بقى ع اي حاجه :
-طفل جاي بحقن مجهري و تلقيح صناعي او بعد فترة طويلة من محاولات الابوين للخلفة . ده بنسميه طفل غالي يا جماعة . يعني لازم نحميه م اي مشاكل لانه جه الدنيا بعد معاناة بجد
-طفل اتحجز ف حضانة . اي طفل اتحجز ف حضانة لازم يتطعم الاتنين اللي فوق دول
-طفل عنده عيوب خلقية في القلب ضروري يتطعم المكورات الرئوية عشان نحميه من ادوار الالتهابات الرئوية و النزلات الشعبية اللي بنشوفها كتير في الحالات دي
-طفل جاتله نزلة معوية او نزلة شعبية في اقل من عمر 6 شهور مرة ع الاقل ضروري يتطعم ضد اللي جاله
- اي طفل مولود في عيلة عندها حساسية يتطعم تطعيم المكورات الرئوية
- لو فيه لا قدر الله حالة وفاة لطفل قبل كده
-طفل اتحجز في مستشفى في عمر اقل من 6 شهور ضروري يتطعم الاتنين
التطعيمات دي بتتاخد م سن شهرين . وموجودة ف عيادات اطباء الاطفال مش الوحدات الصحية او الصيدليات .
وربنا يشفي اطفالنا كلهم يارب
تحويل كودإخفاء محول الأكواد الإبتساماتإخفاء