مش صح على فكرة انك تولدي من غير ما تعرفي الحد الأدنى من المعلومات عن طفلك ،، مش صح تبدأى باللبن الصناعى ،، مش صح يعدى أول أسبوع من غير زيارة طبيب وأخذ ڤيتامين د !
مش صح على فكرة انك لما ابنك يسخن تترعبي وتجرى عالمضاد الحيوى ،، واللى مش صح أكتر انك تتقلي الهدوم عشان "يعرق" ،، وانك متحميهوش عشان "ميبردش" ،، وانك تستخدمى سبرتو او كحول !!
مش صح بالمناسبة ان البرد بيتكرر كل اسبوعين من غير ما نفكر فى الحساسية ،، وان الحرارة تعلىٰ كل شهر من غير ما نشوف السبب ،، وان الڤيتامينات تكون هيا الشاغل الأوحد ليكي مع انك مش مهتمه بالتغذية الصحية السليمة !
مش صح ابنك يجيله إسهال من غير ما تعرفي ازاى بتستخدمى محلول جفاف ، أو ترجيع من غير ما تعرفى ازاى تتعاملى واسم الإبرة (دانسيت او زوفران) لغاية ما تكشفى ،، أو توقفى الرضاعة عشان بيرجع او بيسهل ،، انتى كده بتشاركى بدون وعى فى جريمة الجفاف !
مش صح ان فى أى تحاليل دقتها ١٠٠٪ فى تشخيص حساسية الطعام -لبن وغيره- تحت سن السنة ،، ولا حتى فوق السنة !! ،، مفيش أدقّ من الاستبعاد(منع الأكل المشكوك فيه) ،، والتحدى ( ادخال الاكل وظهور الاعراض) .. ومش صح انه مرض سهل ،، لأ ده أصعب الأمراض فى التشخيص ، والمتابعة ، وتقبل الأهل ، والعلاج!
مش صح ان دكتور يكتب العلاج على وصف الأم من غير كشف ، ومش صح والله اللى بنضطر نعمله من علاج عن بعد !! ومش صح ان أم تاخد رأى دكتور في علاج دكتور تانى ،، لو مش واثقه متكشفيش عنده ومتشتتيش نفسك !
مش صح ان الدكتور سوبر-هيرو ،، ولا بيعالج كل حاجة ،، ولا بيعرف كل حاجة ،، ولا شفاءك بإيده والله ،، ده مجرد سبب ضعيف محتاج عون من الله عشان الشافى ربنا مش هوا ،، فمتعلقيش نفسك بيه - علقيها بمن يدبر الأمر فى السماوات والأرض ..!
شفت فى الطب كتير وقليل ..
ملقيتش أنفع للعيان من الثقة فى الطبيب ،
والأخذ بالأسباب ،،
والتوكل على الله ..
"ومن يتوكل على الله فهو حسبه ، إن الله بالغُ أمرِه .. قد جعل الله لكل شئٍ قدراً"..
اللهم يا سامع الصوت ، اشفِ أطفالنا ، وارحم ضعفنا ، واجبر كسرنا ، وتول أمرنا ، ولا تكلنا إلى أنفسنا طرفة عينٍ ولا أقل منها آمين يا رب العالمين ...
تحويل كودإخفاء محول الأكواد الإبتساماتإخفاء