إزيكم يا أمهاتنا العزيزات بنسمع الجملة دي كتير وحبينا نرد عليها في بوست عشان الكل يستفيد.
" لبني خفيف.. ابني مش بيشبع"..الجملة صح وغلط في نفس الوقت..بصي يا مامي، أي أم عندها نوعين من اللبن: لبن خفيف ولبن تقيل والنوعين موجودين عن أي أم بس توقيت نزولهم مختلف..أول الرضعة بتكون لبن خفيف شفاف كدة أغلبه مية وده هدفه روي العطش، يعني ببساطة كدة أكن البيبي بيشرب مية..بعد ما البيبي يسحب اللبن ده وفي خلال دقايق قليلة بينزل اللبن الخلفي أو اللبن الدهني وده بيكون أغمق وأكثر سماكة وبيكون فيه الدهون والمغذيات.
إحنا بنغلط غلطتين هما إللي بيخلوا الرضاعة ما تبقاش سليمة وبالتالي البيبي ما يشبعش أو وزنه ما يزدش:
1-أول غلطة إننا نرضّع رضعة قصيرة جدًا..يعني من الآخر ما نصبرش لحد ما البيبي يسحب اللبن الخفيف ويدخل على اللبن التقيل الدهني يشربه، وبالتالي إحنا إكننا بنشرّب البيبي مش بناكله..
2-الغلطة التانية نرضّع من ثديين في نفس المرة، وبالتالي البيبي يا خد اللبن الخفيف من ناحية وبعدين أروح ناقلاه على الناحية التانية والبيبي برضع ياخد لبن خفيف برضه فالمحصلة مش حلوة.. الحل إني أرضع البيبي كل مرة من ناحية واحدة بس وافتكر كويس رضعته منين والمرة التانية أرضعه من الناحية التانية..ولو ابنك شهيته حلوة وبيرضه كويس ورضع من ثدي واحد وخلصّه (مفيش ولانقطة بتنزل خالص تقريبا) ولسة جعان ساعتها بس ممكن تجربي تنقلي على الناحية التانية بحيث تضمني إنه وصل للبن المغذي الدهني.. مهم كمان نعرف حاجة مهمة..لبن الأم سهل الهضم ودي من مميزاته عشان كدة البيبي بيجوع بسرعة وده مش معناها إنه لبنك قليل وما بيشبعش بس هو ده العادي في الرضاعة الطبيعية البيبي ممكن عادي جدا بعد ساعة ونص ولا اتنين يجوع..المهم إنك تعرفي إنه مش كل عياط جوع.. وإنه العبرة في النهاية حاجة واحدة بس ..هل وزن البيبي بيزيد بالمعدل الصحي بتاعه ولا لأ؟ ولو لأ هل إنتي متأكدة إنك بتتبعي التعليمات دي وبترضعيه كويس عدد مرات كافية وبأوضاع سليمة تضمن التقام كويس للثدي ولا لأ؟
ياريت يكون البوست أفادكم
تحويل كودإخفاء محول الأكواد الإبتساماتإخفاء