@#_النزله_المعويه_في_الاطفال
نظرا لانتشار حالات الاسهال اليومين دول عملت لكم البوست ده ارجو انه يفيدكم و يكون بسيط عشان الكل يستوعبه
....اتفضلوا
*ابني عنده اسهال يا دكتور ؟؟
طب عرفتي ازااااي يا مدام !!!؟ كام مره و شكله و ريحته و كميته؟؟؟؟
-عديتي عدد مرات الحمام بتاعه كان اكتر من ٣ مرات وفي كل مره كان سايل وكميته كبيره.؟
-او كان زايد عن عدد مراته الطبيعه وبرده سايل
_ او نازل منه وفيه مخاط او دم
عايزه تعرفي اسبابه؟؟؟
بصيتي علي شكل البراز
- زي الميه ومن غير ريحه ( يبقي فيروسي -روتا فيروس) و ده منتشر اليومين دول خريف و شتاء
- زي الميه بس ماسك نفسه شويه وريحته وحشه ( بكتيري) و ده من العك و التلوث
- فيه دم او مخاط او الاتنين مع بعض وبرده ريحته وحشه
(طفيلي) ...دوسنتاريا
** ممكن يكون معاهم حراره وممكن لا
ممكن يكون معاهم ترجيع وممكن لا
طب والحل ؟؟ طبعا بتستشيري الدكتور اللي هيقيم الحاله و غالبا هينصحك بالاتي،،،،
**يستحب اثناء فتره الاسهال تعويض الجسم بالسوائل المفقودة منه حتي لا يحدث جفاف
-و اهم هذه السوائل محلول معالجة الجفاف( o.r.s) ...لان الاسهال ده رد فعل لميكروب او فيروس وخروجه شيئ صحي ودورنا نعوضه اللي بيفقده مع الاسهال ونحميه من الجفاف عن طريق محلول معالجة الجفاف زي hydrosafe
بنحل الكيس في ٢٠٠ مل ماء سبق غليه وبعد كل مره اسهال بندي للطفل من ٥٠ ل ١٠٠ سم منه حسب عمر الطفل و طبعا بنديه الكميه دي ببطئ بمعدل ٥سم كل دقيقه او اكثر ..( ٥٠ مل للمره فنجان تقريبا)
ولو مقبلوش نحطه في التلاجه شويه طعمه بيبقي افضل للطفل و ممكن نضيف عليه موزه مهروسه او معلقه عصير برتقال
_ طب ينفع نعمله بسفن اب او سبريت بدل الميه.؟
_ طبعا لا يستحب ذلك لان ده هيذود نسبه الصوديوم فيه و ممكن يسبب مشكله..
-- طب ينفع نديله سفن اب او سبريت بدل المحلول؟
بردو لأ لانه له مشاكله و لا يعوض الجسم بما يفقده من املاح معدنيه... و يا ريت نتعلم و ربنا يتوب علينا من اللي بيفتي بكده..
-طب ينفع نحطه في ببرونه؟؟
لأ طبعا بلاش استسهال
قيمة المحلول في انه يمتص ببطئ..ركزي
---- طب نديه ميه بعد المحلول اصل فيه دكتور بيقولي مش تشربيه ميه لانها بتعمل جفاف!!!.؟
..لا حول و لا قوه الا بالله
.. طبعا ايوه ياخد ميه عادي خالص بس ما تخليش الميه بديل عن المحلول يعني لما ياخد الكميه المطلوبه من المحلول شربيه ميه عادي الواد عطشان حرام عليكم....
*تعرفوا ان فيه مدرسه في الطب بتفضل عدم علاج الاسهال بمضادات الاسهال وبتقول ان دورنا الوحيد اننا نعوض الطفل بمحلول معالجة الجفاف فقط...
اه والله زيمبؤلك كده 😧
طب ايه هي درجات الجفاف؟؟
الاولي- لهفه علي شرب الميه
الثانيه-العين بدأت تدخل لجوا(عين غائره) والطفل عصبي
الثالثة-غياب الوعي لاقدر الله
علاج درجات الجفاف؟؟
*الاولي في البيت بمحلول المعالجه فقط
*الثانيه في البيت بالمحلول او مستشفي بالمحاليل الوريديه علي حسب حالته
*الثالثه في مستشفي طبعا
طب ونوصل لكده لييييه... ان شاء الله الامهات كلها واعيه لاولادها ومش هنوصل لكده اساسا..👍👍
علاج النزله
** فيروسي :
محلول الجفاف فقط بس لو معاه ترجيع مستمر و مفيش حاجة مستنيه في معده طفلك ومش مستجيب لمضادات القئ او الاسهال اوووفر والطفل غير مستجيب لمحلول الجفاف او رافض ياخده🤐🤔 لازم محاليل وريديه في المستشفي للاسف..
**بكتيري:
محلول الجفاف ومضاد حيوي يحدده الطبيب المعالج ويفضل لو عملنا تحليل براز ومزرعة براز من الاول
**طفيلي
اميبا او جارديا ...فلاجيل ١٠ ايام او نيتازود واخواته
٣ ايام اللي اثبت فاعليته مؤخرا...وطبعا مع محلول الجفاف
**اكل الطفل
-الارز او سيرلاك الارز
-مكرونه مسلوقه بدون اي اضافات
-شوربة خضار و لسان عصفور
- الجزر المسلوق
- عصير الجوافه
-البطاطس المسلوقه و البطاطا
-شاي خفيف مع بسكويت ساده
-فيه اكلات جاهزه زي
Caroz كاروز
-الطفل اللي بيرضع طبيعي يكمل رضاعته عادي جدا و متسمعيش لحد يقولك وقفي او قللي الرضاعه
ولو بيرضع صناعي والاسهال استمر اكتر من اسبوع بنغير نوع اللبن للبن خالي من اللاكتيلوز زي
Beblac fl.، herobaby fl.,leptomilk fl.,
** اللجوء للمحاليل الوريديه بيكون في حالة
--وجود ترجيع مستمر وعدم استجابته لمضادات القئ واحسنهم
Zofran بس غالي
Danset
Zofatron
Emerst
او كمية الاسهال اووووفر والطفل مش مستجيب لمحلول الجفاف وبدأت حالته تتدهور 😢
***ادوية الاسهال الجيده
انتينال واخواته
نيتازود واخواته
دياكان مركب و اخواته
استربتوكين و اخواته
** دواء الزنك فعلا فعلا بيحمي من النزلات المتكرره وجرعته ٥ سم لمدة ١٠ ايام
** الحمايه
-تطعيم الروتا مهم جدا جدا و لكنه غالي بس تمنه لا يساوي ان الطفل يتحجز في المستشفي
- نظافة اشياء الطفل وبالاخص في فترة التسنين ( كل حاجه بتلاقيها علي بقه)
- الابتعاد عن المواد الحافظه واكل التيك اواي
- التخلص من البامبرز بعد الحمام لانه مصدر للعدوي وبالاخص الفيروسيه
**** ربنا يجعلني سبب في شفاء ابنائكم و اسالكم الدعاء
ملحوظه
**في اوروبا والدول المتقدمه بيعملوا تحليل براز ومزرعه وتحليل خاص للروتا وبيعرفوا سببه من البدايه وبيتعاملوا معاه...تخيلوا
والتحاليل دي طبعا موجوده عندنا بس غاليه جدا مش كل الناس تقدر تعملها...
......
تحويل كودإخفاء محول الأكواد الإبتساماتإخفاء