امبارح الساعه واحده ونص بلليل..فعز البرد..اتعلملي عرض باطنه فالطواري..نزلت ارد عليه لقيت ست كبيره قاعده مع شاب كدا من سني..سالتها عن اللي تعبها وكشفت عليها كان ضغطها مرتفع شويه
وسكرها عالي..طمنتها واديتها علاج وانسولين وكدا واديته لابنها وقلتله الحجه زي الفل بس محتاجه تتابع الولد بكل ادب خد الورقه والعلاج وجاله تليفون كدا وطلع يتكلم برا..قلتلها ياحجه ابنك ده شكله خايف عليكي اوي..قالتلي ده مش ابني ! انا جوزي مات وولادي مابقوش يسالوا عليا" قلتلها امال ده مين.. !
"قالتلي ده شاب ابن حلال والله شافني ماشيه فالبرد عند اول الشارع خدني فعربيته ووصلني ودخل معايا لحد المستشفي وقالي مش هسيبك يا امي غير لما اتطمن عليكي..ربنا يكرمه ويرزقه ومايشوف وحش فحبايبه"
لقيته واحنا بنتكلم دخل واعتذر انه مشي..وخدها من ايدها وراح الطواري..لقيته جالي تاني وقالي الانسولين مش موجود..روحت اتاكدت لقيته فعلا خلص..قالي اكتبهولي اشتريهوالها..بصتله باستغراب كدا وكتبتهوله فعلا وراح يجيبه..الست سالت عليه فقلتلها..قالتلي يا حبيبي يابني ايه اللي يخرجك فالبرد ده بس..ربنا يابني يحميك ويرجعك بالسلامه..شويه وجه وقالي انا اتاخرت معلش عشان ماكنتش فيه ولاصيدليه فاتحه..هو ده الانسولين الي حضرتك طلبته لو مش هو اروح وارجعه..قلتله لا هو تمام..الست دخلت تاخد العلاج وهو فضل معايا برا..
جاله تليفون تاني فضل يتكلم وجالي وهو عيونه مدمعه جامد وبيضحك وبيقول "الحمد لله يارب يامنتاكريم" قلتله يارب اجعله خير..
"قالي مراتي كانت بتولد..بس هي فمحافظه تانيه انا جاي هناك اشتغل وخلصت متاخر فمالحقتهاش..نزفت جامد وكانت محتاجه دم وماكانوش لاقيين خالص..امي اتصلت بيا دلوقت وقالتلي ولاد الحلال جابولي خمس اكياس حالا ومشيوا والحمد لله بتاخد الدم دلوقت والمولود كويس الحمد لله..يارب الحمد لله اللهم لك الحمد"
انا مبقيتش مصدق! عيوني دمعت وماقدرتش امنعها..
الست اول ماخرجت الشاب ده خدها فحضنه وفضل يبوس فايدها ويقولها ربنا يخليكي ليا يا امي..ربنا يخليكي ليا يا امي ربنا يشفي عنك يارب.."
خدها فايده تتسند عليه..لحد ماخرجوا من الطواريء وغابوا عن نظري..
تحويل كودإخفاء محول الأكواد الإبتساماتإخفاء