لحظة بس !!!
ابنك اللى انتى مفكراه مش بيشبع وعاوزه تديله لبن صناعى ده لو صبرتى عليه شوية وزودتى وقت الرضعة من كل ثدى وكرعتيه كويس ونيمتيه بعد الرضعه وضع ٤٥ درجة
انتفاخاته هتقل وهيوصل له اللبن الخلفى اللى مليان دهون وهيشبع وينام ولا الحوجة للصناعى .
لحظة بس !!!
بنتك اللى #مناخيرها سايبة طول الشتا دى مش عندها برد ،، دي حساسية أنف ولازم تتعالج بالبخاخات مش ادوية الشرب بس !
لحظة بس !!!
جوزك اللى بيدخن ده ،، لو مش هيبطل عشان نفسه ، يبطل عشان ابنه ،، حتى لو بيشرب بره ،، ريحة هدومه كفاية انها "تهيج" صدر ابنك .!
لحظة بس !!!
ابنك اللى بيسخن بشكل متكرر ده لازم نتطمن ان الادوار مش سببها حساسية الأنف(مشمومات او طعام) ، ونتطمن عاللحمية ،، ونبعده عن أى مصدر عدوى (حضانة مثلاً) ،، ونتطمن انه مش حمى البحر المتوسط ، وفى الآخر نحلل عشان نقص المناعة..
لحظة بس !!!
ميبقاش أكلك كله كريب وشاورما وفطاير وبهارات ومسبك وحراق ومنبهات وعاوزه البيبي ينام كويس !
اذا كنتى واكلة أكل يصحيكى شخصياً تلات سنين قدام ! عاوزه ابنك ينام ؟؟ 😭
لحظة بس !!!
متبقيش أم ناصحة لو سايبة ابنك بيشرق منك ويكح كل رضعه ،، أو بيعمل حمام سايل وممخط من ساعة ما اتولد ،، او بيحزق لغاية ما وشه يحمرّ بشكل متكرر ،، أو بيكحّ مبيفصلش من دور يدخل فى التانى ،، أو بيرجّع بشكل فظيع ووزنه متأثر ،، أو مبينيمكيش وبيزن ليل نهار -
من غير ما تكشفى عند دكتور بيعرف يشخص حساسيات الطعام .
لحظة بس !!!
ميبقاش حد فى العيلة من ناحيتك أو ناحية جوزك عنده انيميا فول ( يعنى بيشحب ويتعب ويجيله انيميا لما ياكل فول ) وتدخلى لابنك الفول من غير تحليل انيميا الفول G6PD Assay !!
لحظة بس !!!
ميبقاش بنتك فى الشهر الخامس - ولسه راسها مش ثابته لما تشيليها ،، او في العاشر ولسه مش بتقعد لوحدها ،، او عدت سنة ولسه لما بتوقفيها بتقع علطول ،، او عندها سنة ونص ولسه مبتمشيش ،، وانتى بتقولى عادى وقاعده ترزعيها ف كالسيوم ✋😢 ،، لازم تتطمنى عالمخ ، الأعصاب ، العضلات !
لحظة بس !!!
العكس بأه ✋ مش المفروض ابنك يطير عالشهر التاسع !! ولا يطلع انياب ومخالب على السنة !!
ولا يتحكم فى البراز بشكل كامل قبل ٤ سنين ،، ولا البول قبل ٥ سنين ،، اه في اطفال بيتحكموا قبل كده ، بس احنا بنتكلم امتا نقلق ونكشف .
لحظة بس !!!
مش مقبول بنتك تشتكى من حمام البول من غير ما تكشفى ،، او تهرش كتير من غير ما تتطمنى ،، او تنزل افرازات ، او تسلخات أمامية متكررة مكان خروج البول من غير ما تشوفى السبب ،، معظم البنات بيتشطفوا بالمياه بعد الحمام -البراز- من الخلف للأمام ،، فينقل الميكروبات من البراز لفتحة مجرى البول والمهبل ، ويحصل اللى بنقوله ده ، والحل؟ التشطيف للبراز من الأمام للخلف 📢📢 مهم جداً والله !
لحظة بس !!!
لسه مش عارفه إن الأمومة مش ترف ؟ ..
وإنك معاكى مهنة مينفعش معاها
الزهق أو القرف !
وإن صبرك على ابنك
وتربيته صح
ده قمة الشرف !
افتخرى .. انتى أمّ 👍❤️
د.أحمد الخطيب
تحويل كودإخفاء محول الأكواد الإبتساماتإخفاء