دليل ماما دكتورة الطوارئ !
❤يلّا نبدأ ...
😉هتولدى بالسلامة ؟ اتأكدتى من وجود دكتور الأطفال مستنى البيبي ؟ سمعتى صوته؟ متشنّجش ولا ازرقّ ولا جاتله صفرا؟ اتأكدتى انه ادّاله فيتامين ك ؟ خدتيه في حضنك وحطيتى الفم على الحلمة ؟؟ لا مش عاوز بيبي درينك ولا لبن صناعى ،، شوية والسرسوب ينزل متقلقيش!
اديتى فيتامين د أول يوم "٤٠٠وحدة"؟ وحديد من الشهر السادس ٧ملجم ؟ وكملتى عليهم لغاية ما البيبي بقا بياكل أكل فيه حديد وفيتامين ؟؟ لأ ،، مش محتاج فيتامين أ الا بعد السنتين بياخده في التطعيمات ،، ٢ كبسولة أ ڤيتون كل ٦ شهور لحاااد ٥ سنين ،، . ولا محتاج كالسيوم ،، أمّال بترضعيه لبن ليه!!
٣.البيبي بيعيط ومش عارفه السبب
😩؟مش حرّان ولا سقعان ولا جعّان ولا عطشان ؟ ولا عاوز ينام؟ انتفاخات ؟ ادّيتى سايميثيكون ؟ كرعتى البيبي كويس كل رضعه؟ قلعتي البامبرز واتأكدتى ان مفيش تسلخات ؟ قلعتى البيبي خالص ومفيش قرص حشرات ولا شعرة ملفوفه حوالين صباعه؟السرة مش ملتهبة ؟ مفيش فطريات جوا الفمّ ؟ لسه بيعيط؟ اكشفى عشان ممكن تكون التهاب في الأذن الوسطىٰ أو نزلة شعبية .أو خدي التقيلة ،،، حساسية لبن
😧😧.!٤. البيبي عنده صفرا ؟ ظهرت تانى أو تالت يوم ؟ عملتى تحليل ومش بتزيد كل يوم > ٥ درجات ؟ رضعتى البيبي كويس وبدأت تقل بعد أسبوع ؟ تمام ،، دى صفرا طبيعية مش محتاجه ڤيتامينات ولا "لنضة" نيون على فكرة
😊 غير كده اكشفى !٥. البيبي سخن ؟
خففتى الهدوم
👚؟هويتى الأوضه ؟اديتى خافض حراره ؟حمّيتى البيبي
🚿 ؟عملتى كمادات ؟ الحرارة لسه فوق ٣٨،٥ ؟؟اكشفى فوراً !
٦.البيبي سخن ؟
خدى المفاتيح دى :
حرارة + رشح وكحة خفيفة = برد عادى يعنى!
*حرارة + احتقان حلق جامد ورفض اكل تماما وحيل = التهاب حلق بكتيرى غالباً ,،،، والايام دي هربس وكوكساكي وأشياء أخرىٰ!
*حرارة + إسهال = نزلة معوية !
*حرارة + كحة شديدة ونهجان شديد وزيادة معدل التنفس = التهاب رئوى غالباً!
*حرارة + ألم تبول = التهابات مسالك بولية!
*حرارة+ هرش مستمر فى الأذن وزَنّ رهيب أو صديد من الأذن = التهاب أذن وسطىٰ !
٧. طفلك ب"يقشط" ؟
"القشط" ده عملية " سلبية " بدون اي مجهود بتحصل والبيبي نايم بيسيل اللبن على جانب الفم سواء كان مجبن او سايل ،، أما الترجيع محتاج مجهود واندفاع،،لو معاه تألم الطفل أو طول اليوم بيزن ويعاني أو الوزن مش بيزيد أو معاه التهابات شعبية وكحة أو استمر بعد سنة ونصف لازم تستشيري الطبيب عشان كده يبقى ارتجاع عنيف أو ممكن يكون حاجات كتير زي حساسية اللبن أو أمراض جراحية ،،غير كده ولا يهمك انتي بس " كرعى البيبي" مرتين كل رضعة ونظمي الرضاعة كل ٢-٣ ساعات ، وارفعي البيبي ٤٥ درجه على المخدة لمدة ساعة بعد الرضاعه إن شاء الله هيتحسن ويختفي من ٦ شهور ل سنة ونص ٨٠٪ من الحالات.
٨.طفلك ب " يرجّع " ؟؟
الترجيع مرة أو مرتين؟ والطفل زود في الأكل أو حضرتك زودتى في الرضعه؟ أو كان بيلعب او راكب عربيه و"داخ" فرجّع؟؟ أو طعم الدوا مش عجبه فرجّع؟؟ أو كَحّ جامد فرجّع أو الترجيع عنده هواية فرجّع
😂؟؟نريّح المعده ٣-٤ساعات ونأكّل تانى غالباً مش هيرجّع!
لو الترجيع مستمر أو معاه حرارة أو إسهال أو دم أو جفاف أو ألم في البطن نعطى ابرة ترجيع (دانسيت أو زوفران ) ومحلول جفاف ونكشف فوراً لأ متدّيش أنتينال من نفسك
😩!!٩. مبندّيش أنتينال من غير ما نشخص سبب الترجيع ٩٩.٩٪ من حالات الترجيع الى شفتها بيكون تهيج في جدار المعدة عشان "عكّ" في الأكل ،، مش ميكروبات،، وبتبقى محتاجه راحة من الأكل و مضاد للحموضه زى جافيسكون !
١٠. إسهال ؟
*بسيط وزايد عن الطبيعي مرة او مرتين وريحته مش وحشه للدرجه ومش فيه دم ولا مخاط تقيل ولا ألم أثناء الحمام ؟؟ ولا أى حاجه !
*كتير وريحته وحشة جدا وزى المياه وفيه مخاط ده روتا أو أميبا ناخد نانازوكسيد وسلفوزنك ومحلول جفاف ،، لأ مش عاوزين كابكت ولا سمكتا ولا مضاد حيوى ..!
في دم أو يبقى نكشف فوراً ممكن حاجات كتير أبسطها حساسية اللبن والنزلات المعوية البكتيرية وأخطرها مرض "كرونز"و"القولون المتقرّح" ونوع معين من الانسداد المعوى intussusception بييجى ببراز مدمم بلون التوت مش إسهال !
١١. مفيش حاجة اسمها ادّى محاليل واركب كانيولا عشان ب"يسهل ويرجّع" طول ما الطفل مفقدش وعيه و طول ما الطفل بيقدر يبلع بالفم كويس والله يبقى علاجه محلول جفاف والتحسن خلال ٤ساعات يعنى في وقتها والله ،، آه ،، احنا بنعمل كده وبفضل الله كل الحالات بتتحسن والحالات الى علقت محاليل لا تتعدى ١٪
🙌١٢. إمساك ؟
غيرتى اللبن الصناعى أو دخلتى أكلة جديدة أو الدنيا حرّ وانتى مش بتشرَّبي مياه(بعد الشهر الرابع) والأكل مافيهوش فواكه ولا خضار كتير؟؟
ادّى زيت لوز ٣مل لكل كيلوغرام متقسم على جرعتين ،، شربي عصير تفاح او قراصيا وخففيه بالمياه ١٠:١ مفعول السحر صدقينى ..،، لاكتيولوز ولبوس جلسرين والحقن الشرجية حل أخير،، مع الكشف بالطبع..!
متنسيش حساسية اللبن
😈١٣. كحة ؟
لو خفيفة و معاها رشح وانسداد أنف هنستخدم فنستيل > شهر أو كلاريتين>سنتين مع محلول ملح للأنف أو فيزيومير ،، سوايل دافية طبعاً،، ده برد عادى حضرتك !
ده برد عادى حضرتك !
لو تقيلة ومعاها صوت "بلغم" أو "تزييق" ممكن يكون انسداد شعب هوائية هنحتاج موسع شعب زى سالبيوتامول ! تحت اشراف الطبيب بالطبع
👷🏻لأ متديش لبوس مينوفيللين
😡 ولو اتكررت نفكر في الحساسية ..!ولو صوتها غليظ ومعاها اختناق في الشهيق تبقى غالباً التهابات حنجره اوعى تدى موسع شعب ،محتاجين جلسات أدرينالين !
ولو النفس بيقطع والطفل بيزرق أومعاها حرارة ونهجان وصعوبة تتفس أو متكررة نكشف فوراً ..!
١٤. البلغم مش مبلول يا دكاترة ويا أمهات عشان اديله انتى بيوتك ينشّفه
😂١٥. مالوش نِفس ياكُل
😷 ووزنه قليل؟؟عملتى تحليل براز وصورة دم كامله ،، عالجتى الأميبا والديدان والأنيميا؟؟ اتحايلتى عليه في الأكل ونوعتى الوجبات وزودتى نكهات على اللبن والزبادى وجريتى وراه بطبق والطبق التانى ف إيده يرميه على لبسه والأرض وبرضه رافض؟الحمد لله مفيش أمراض مزمنة زى الحساسية والدرن و القلب والكلى ولا التهابات حلق متكررة ؟
تمام منقلقش خالص اقرأى رقمً ١٦.
١٦. وزنه قليل ومافيش أمراض بس عاوزاه يتخن ؟
خدى الهدية دى
🎁 من ٤ منظمات عالمية على رأسها اليونيسيف :تركيبة F100 = ١٠٠ك سعر حرارى ،،
(علبة زبادى (من الشهر الثامن) أو كوب لبن ١٠٠مل + معلقة سكر + ٢ مل زيت زيتون.)
التركيبة دى بالإضافه للرضاعة أو الأكل زى ماهوا ونركز على الخضروات
🍅والفاكهة
🍉
🍓
🍌
🍑والبروتين 
🍗
🐓
🐟،، متنسيش ٤نقط ڤيدروب و ١/٤ قطارة هيدروفيرين يومياً.عدد وجبات التركيبة يوميا = نصف وزن الطفل ،،مثال وزن طفل ١٠ كيلو يحتاج ٥ علب زبادى يومياً ،،
اوزنى الطفل قبل وبعد التركيبة بشهر ،، وشوفى الفرق بإذن الله
💪💪💪١٧. التشنجات المتكررة ؟
فوراً نستخدم airway عشان ميبلعش لسانه ولازم يكون عندك أسطوانة أكسجين ( موجودة أحيانا ) نستخدم القناع للطفل ،، و بسرعة على ما بابا يجيب العربية ونروح المستشفى نجيب أمبول neuril ونركّب "رايل " في فتحة الشرج ونعطيه الأمبول مركز كامل (٢مل) ..! أى أم ابنها بيجيله تشنجات متكررة ( صرع ، ضمور مخ ، ) فاهمه انا بقول إيه و الكلام ده بالنسبة لها Life saving والله!
١٨. التشنجات الحرارية ؟
يعنى ابنك سخن والحرارة عملت تشنجات ،، مبدأياً نزّلى الطفل من أى مكان عالى (سرير- كرسي-كنبة) على الأرض فوراً عشان ميقعش ويأذى نفسه.حاولى تنيميه على جنبه عشان ميبلعش لو رجّع ،، وتشيلي أى حاجة كانت في الفم وإياكى تحاولى تحطى حاجه في الفم (عشان ممكن يكسرها وتسد مجرى التنفس-لا قدر الله)
ماتحاوليش تفردى إيديه ورجليه لما يتشنج وسيبيه تماماً ،، بصى على الساعة واحسبي ،، متقلقيش هتقف لوحدها غالباً تنزيل الحرارة مش هيفرق ،،
لو عدى > ١٠ دقايق بيتشنج لازم تنقليه مستشفى فوراً .
١٩. امتا الطفل لازم يتحجز فى المستشفى ؟
لو الطفل أقل من سنة ونصف ، أو فوق ٥ سنوات ، أو الوعى متغيّر ( فاقد الوعى أو مدلوخ فتره طويلة بعدها)، أو التشنجات فى نصف واحد من الجسم (يمين أو شمال) ، أو اتكررت مرتين خلال ٢٤ساعة ،، يبقى لازم حجز مستشفى وتحاليل كاملة وآشعة مخ ،، المعلومة دى لدكاترة الامتياز وحديثى التخرج مهمة جداً ،، الغلطة تساوى الوفاة عشان دى مش تشنجات حرارية بسيطة دى غالباً التهاب مخ Take care..!
٢٠. الجرى والتنطيط
⚽
🚴🏼
🏇 الحق يا دكتور الولد راسه اتخبطت !!هنلاحظ الطفل خلال ٢٤ ساعة ،، لو مش فقد وعيه أو اتغيرت درجة الوعى ( دوخة ،، هيجان ،،) أو اتشنج ،، أو رجّع ترجيع مستمرّ ،، يبقى إن شاء الله منخافش ومفيش مضاعفات ،،
إنما لو أى حاجة من دى حصلت لازم فوراً كشف و فحص عصبى كامل مع إمكانية طلب آشعة مقطعية على المخ لاستبعاد النزيف ،، مع العلم بوجوب متابعة الطفل لمدة ٤٨ ساعة على الأقل بعدها .
٢١. الولد بينزف من الأنف !
عنده برد ؟ عالجتيه؟ حطّ حاجه فى الأنف ( خرزه ، لعبه، حجر صغير) ؟ شيلتيها؟؟ ضغطه كويس ؟ اتطمنتى على الضغط ؟؟
هوا متعود ينزف في الحر والرطوبة ؟ تمام ،، بالترتيب :
* اغلقى فتحتى الأنف بالإصبع أو مشبك لمدة ٥-١٠ دقائق مع وضع قطعة ثلج صغيره مجروشه فوق الأنف بقطعة قماش،، لسه بينزف ؟؟،، قطعة منديل صغيرة يتم غمسها فى قطرة ( أوتريفين أطفال الزرقاء) ووضعها برفق في فتحتى الأنف ، كل قطعة فتحة لمدة نصف ساعه فقط أمهات كتير بترفع الرأس للخلف وده مش مضبوط عشان ميبلعش الدم او يشرق فيه ،، ولا للأمام عشان ميرفعش ضغط الأنف وينزف أكتر،،الصحّ الوضع الطبيعي القائم مع الاحتياطات السابقه ،،لسه برضه بينزف؟؟ نروح اي مستشفى طوارئ دكتور انف واذن هيعمل سدادة انف خلفية أو كيّ للشعيرات الدموية.
٢٢. الشَّرقان أو الزرقان أثناء الرضاعة أو الشرب أو الأكل :
فوراً نقلب البيبي بحيث يكون الرأس لأسفل و"نخبط" على أعلى الظهر برفق وحزم بشكل متتالى ،، لو مش جاب نتيجه حالاً على المستشفىٰ ،، ومفيش حاجه اسمها ننفخ في نافوخه وشغل الساحرات ده
😈😈😈تخيلى
💡💡شفنا أطفال كتير جداً عندهم تأخر فى القعود والوقوف
🚶🏻والمشى ومتشخصين غلط لين عظام للأسف
💥لو الدكتور كتبلك "إبر كالسيوم " أو حقن ڤيتامين د "
💉 بكل هدوء ناقشى الدكتور ليه كتب من غير تحليل ولا آشعه ؟ ولو بقالنا شهر ونصف مفيش تحسن يبقىٰ وارد جداً يكون المشكلة في المخ من الأعصاب ، العضلات !!٢٤. ماما لازم تعرف المعلومات دي :
الطفل بيثبت راسه على ٤ أشهر ، يقعد لوحده ٧ ، يزحف ٩ ، يقف على نهاية السنة ، المشى لغاية سنة ونصف مسموح بالتأخير ، التسنين لغاية سنة وشهر مسموح ميطلعش ولا سنة ويكون طبيعى،، في اختلافات فردية شهر أو شهرين ،
٢٥. عزيزى الطبيب :
مش بنكره الأنتى بيوتك والله ولا المحاليل وساعات بنعالج بيهم ، بس بِحَقِّها ،، غير كده يبقى بنعرض الطفل لخطر المحاليل وبنضعف جهاز المناعة و بنخلق جيل من الميكروبات مستعصى على كل المضادات الّى موجوده في السوق ،،
🔥 عصر مابعد الأنتي بيوتك قريب بحقّ،، حيث تكون العدوى البسيطة والأمراض الشائعة قاتلة !!🔥منظمة الصحة العالمية ٢٠١٤
٢٦. البيبي بيمُصّ صباعه في بُقُّه !!
مش خايف ولا جعان ولا زهقان ؟؟ طيب لو أقل من ٤ سنين منخافش هتختفى لوحدها ومش هتأثر على شكل الفك ولا الأسنان المؤقته ، لو كمل بعد كده نعرض على دكتور نفسيه،، لأ متضربيهوش ولا تشيلي ايده بالعافيه لانه هيعند ،، ولا تحطى شطه ولا كمون لإنه هيبقى مدمن شطه وهيقول كمان
😂اشغليه بس يعنى احدفيله كورة ،، ولو زعلان خليه يتكلم بدل مايعبر عن زعله بمص صباعه ولو نونو رضعيه ،،،ندهن صباعه ملطف للجلد قبل النوم لو "اتهرىٰ "،،، بس كده
😊😊٢٧.ابنى عنده غدد متضخمه "حيل " ..!
التضخم الموضعى" الحيل" ،، تقريباً مفيش أم ماشافتهوش ،، أثناء التهاب الحلق واللوز،، الأذن،، خراريج الأسنان،، جروح الرأس ،،تخيلو قرص الناموس يعملها!! خربشة القطة تعمل "حيل
" تحت الإبط...!! وده مفيش منه قلق ،،، بنعالج السبب وبيتحسن ان شاء الله مع العلاج،، أما لو منتشر في الجسم كله ومعاه تضخم كبد او طحال او انيميا شديده ،، لازم صورة دم كاملة وسرعة ترسيب وتحاليل تانيه احنا بنستبعد الأورام يا فندم.!
٢٨. والله العظيم علاج الحساسية مش أنتى بيوتك
😂😂٢٩. علاج الحساسية الجلسات والبخاخات مع أخصائى حساسية ، انتى لسه متعرفيش ان ادوية الشرب واللبوس كعلاج مزمن للحساسية اتلغى من زمان
😳😳😳٣٠. بالعامية ....
مامى معانا ولسه معرفتيش ان البيبي اول شهر بينام حوالى ١٦ ساعة ،، وبيرضع كل ساعتين ،، وبيعمل حمام (بول) كتير جداً ٨-١٠ مرات يومياً،، وبراز ٢-٥ مرات تقريباً ،، والمغص والقشط عنده طبيعي ،، وبيتابعك بعينه الشهر التانى ،، وبيضحك في الثالث أو الرابع ،، وانك مش محتاجه كالسيوم طالما بيرضع كويس ،، ولازم نغير الحفاضه كل مرة حمام بول او براز بزيت زيتون أو زنك عشان الجلد حساس والتسلخات، والشياله من أول يوم لو عاوزه ، والمشاية من ٨-٩ أشهر ومش بفضّلها، وان أهم تطعيمات خارجية من وجهة نظرى الروتا والمكور الرئوى، وان ابنك العندى محتاج تضميه وتحتويه مش تضربيه وتنتقمى منه، وان البيت الّى الصوت فيه مش عالى والحبّ موجود مابين الأب والأم هوا البيئة المناسبة لأطفال أصحاء نفسياً ومبدعين ،، وان بابا لازم يعرف ان الرسول صلى الله عليه وسلم بيقول " خيركم خيركم لأهله ، وأنا خيركم لأهلى "..
وان حضرتك لازم تشيرى المقال ده عشان الخير ما يقفش عندك !!
وكل سنة وانتو طيبين ويا رب تكون الهدية عجبتكم
د\احمد الخطيب
تحويل كودإخفاء محول الأكواد الإبتساماتإخفاء