أمهات كتيييييييييييييير مش بيعرفوا المعدلات الطبيعية لأطفالهم حديثى الولادة ،، سواء كان حمام ، نوم ، حرارة ، لون جلد ،، ده بيخليهم يتخيلوا أمراض مش موجودة أساساً 😅
أو مش بيلاحظوا أمراض مزمنة مأثرة على أطفالهم 😢
يلا نبدأ ؟؟
البول :
حديث الولادة ممكن يعمل بول مرة كل ساعة لغاية ٩-١٢ مرة يومياً ،، وممكن يعمل ٣-٤ مرات بس يومياً ويكون عادى . بعد دخول الأكل وقلة الرضاعة العدد هيقل طبعاً ،،، لاحظى ان العدد ده ممكن يقل للنصف ويبقى مُركزّ ويسيب أثر Pink فى البامبرز فى حالات قلة الرضاعة او سوايل الأم و الحرارة والمرض والجفاف!
لاحظى كمان انك محتاجة تغيرى البامبرز لكل مرة بول مش بس البراز !
#امتا_اقلق؟؟
لو اللون أحمر- دم ،، أو غامق زى الشاى أو العرقسوس ، أو في أى وجع أثناء التبول ،، أو معملش حمام بول خالص لمدة يوم كامل - نكشف فوراً 👍
البراز :
أول ١-٢ يوم ولادة أسود مخضر - فضلات الجنين- ،، بعد كده أصفر أو أصفر مخضر ومعاه حبيبات ،، ممكن يبقى أخضر مع قلة الرضاعة او ادخال الأكل صعب الهضم .
القوام بيبقى طرى أو سايل أو سايل جداً بينشف شوية مع الصناعى وإدخال الأكل ..
العدد ممكن يكون قليل لدرجة مرة كل أسبوع أو كتير لدرجة مرة كل رضعة ،، هيقل ل ٣-٤ مرات مع ادخال الاكل ،، ويوصل لمرة - مرتين بعد السنة.
الريحة ،، أكيد مش بيرفيوم يعنى 😅 بس لو وحشة أوى مهم نشوف السبب!
#امتا_أقلق؟
لو فيه دم أو معرق بدم أو مخاط مستمر أو ناشف جداٌ أو معاه حزق مستمر أو أقل من ٣ مرات فى الأسبوع أو مبيعملش إلا بلبوس !
الترجيع :
اللى على جانب الفم ده ومن غير مجهود او اندفاع ده اسمه ارتجاع سواء سايل أو مجبن (قشط) ،، وده طبيعى طالما الطفل بيزيد في الوزن ومش معاه حزق مستمر أو تسلخات مزمنة أو إكزيما أو كحة وتزييق صدر متكررة (أعراض حساسية اللبن) و طالما مش أخضر ولا فيه دم -- وبيختفى غالباً على ٦-٨ شهور .
اللى باندفاع وقوة ده اسمه ترجيع ومحتاج كشف طبعاً.
الحرارة :
من ٣٦،٥ ل ٣٧،٢ مقبول ،، لو زادت عن كده نحاول نقلل الهدوم والأغطية يمكن زيادة تغطية ،، لو لسه عالية ٣٨ أو أكتر والطفل أقل من شهرين نكشف فوراً ،، لو فوق شهرين ندى باراسيتامول ونصبر يومين إلا لو الطفل مش Active أو الرضاعة ضعيفة أو في أى علامات مرض تانى (رشح - كحة- ترجيع- إسهال- إمساك - إلى آخره.).
لون الجلد :
الطبيعى ،، ناخد بالنا لو الشفايف زرقا أو سودا Cyanosis نكشف فوراً عشان نتطمن عالقلب و الجهاز التنفسي ،، لو الجلد شاحب أو باهت Pale ناخد بالنا من الأنيميا بالذات لو اللون بهت بشكل مفاجئ والبول بقى غامق - انيميا تكسيرية (فول) غالباً ،، لو اللون اصفرّ أول يوم ولادة دي صفراء مرضية غالباً ولازم كشف فورى ،، لو اصفرّ تاني أو تالت يوم غالباً صفراء طبيعية وبرضه لازم كشف بس نتطمن 👍
النوم يا ولدى 😥
أول شهرين ممكن ينام من ١٦-١٨ ساعة ،، استنى بس يا ستى ،، متفرحيش أوى كده 😁
ده طبيعي جداً انه يصحالك كل ساعتين أو ٤ ساعات ععشان يطالب بحقه الشرعى ! الرضاعة 😉
من شهرين ل ٤ شهور ،، هيقدر ينام ٤-٦ ساعات متتالية ،،، متنسيش انك لازم تساعديه بالرضاعة ، اللهاية ، الهزّ ، الاستحمام ،، عشان الأطفال في السن ده مش بيقدروا يبدأوا "دورة النوم !
من ٤-٦ شهور ممكن ينام ٦- ٨ ساعات متتالية .
من ٦-١٢ شهر يقدر ينام ٦-١٢ ساعة متتالية ... بس خلى بالك كتير من الاطفال بيرجع ينام تانى نوم وحش عشان امهات كتير بتبدأ تفصلهم في سرير لوحدهم ،، محتاجة تنامى جنبه فتره الأول عشان يحس بالأمان وكل فتره تقعدى جنبه !!
بعد سنة - ٦ سنوات ،، المتوسط بيكون ١٠-١١ ساعة تقريباً بعد كده بيكون من ٩-١٢ ساعة 👍
مهم جداً نعرف ان من أهم أسباب عدم النوم الأمراض المزمنة زى مشاكل الجهاز الهضمى وحساسيات الطعام ،، كمان الارتجاع الداخلى للبن ،، كمان مننساش الطبيعة العصبية للأب أو الأم وعدم تهيئة الجو المناسب للنوم من ظلام وهدوء وصوت يشعر بالأمان زى أغنية بصوت الأم أو قصة ...❤️
أرجو يكون المقال ده فادكم جداً ،، مهم أوى كل أم جديدة تعرف المعلومات دى .
#شير_في_الخير ...
د.أحمد الخطيب..
تحويل كودإخفاء محول الأكواد الإبتساماتإخفاء