**أيوا يعنى انتا عاوز تقولّى يا حاجّ ان ابنى اللى طول السنة عمال "مناخيره " مش مبطله رشح ،، وزكام ليل نهار ،، والكحة اللى مبتفصلش ،، كل ده ممكن يتحل من غير دوا 😧😧 طب ازااااى ؟

**أيوا يعنى انتا عاوز تقولّى يا حاجّ ان ابنى اللى طول السنة عمال "مناخيره " مش مبطله رشح ،، وزكام ليل نهار ،، والكحة اللى مبتفصلش ،، كل ده ممكن يتحل من غير دوا 😧😧 طب ازااااى ؟

- مبدأيا اسمها حضرتك مش انتا ، وانا دكتور مش حاجّ ،، وآه طبعاً ،، بشرط تبعدى عن الحاجة اللى بتتعبه !

**لحظه بس ✋هوا الحساسية دي مش برد بيتكرر؟

- لأ طبعاً ، النظره دي هيا اللى خلتنا نفهم الحساسية غلط فنعالجها غلط ،، تعالى اشرحلك ..
 الحساسية دي يعنى رد فعل غير متوقع ، او قوى ، او مستمر من طفلك ضد الحاجات اللى "المفروض متأذيش الأطفال العاديين" ،، ده معناه ،، ان لو عرفنا ببساطه ابنك ايه بالضبط اللى بيتعبه هنشيل ده من ده ...

**يرتاح ده عن ده 😁... يعنى تقصد انى لو بعدت ابنى عن "مسببات الحساسية" ،، ممكن يخف من غير علاج 😀 لوووووولووووووولوووووى 😃

-استنى بس قبل ما الزغروطه والشربات احب اقولك انه مش هيخف ،، هوا هيبعد عن اللي بيتعبه فهيتحسن جداً جداً لدرجة انك مش هتحسى انه محتاج دوا ، الا لو اتعرض تانى للى بيتعبه !

** قولى ايه اللي بيتعبه وابعده عنه ازاى شوقتنى !

- بصى يا ستى مبدأياً كده "العفن" من أكبر مسببات الحساسية للأنف والصدر في العالم لدرجة انهم في أمريكا بيعتقدوا ان أى طفل لو عملوله اختبار للعفن هيلاقوه متحسس منه وهي...

** لا استنا يامحترم ، فوق لنفسك انتا مش عشان دكتور ومتعلم تغلط فى ولاد الناس 😡 فشر ..
انا ولادي انضف عيال فى الحتة ده انا بحميهم كل يوم لغاية ما باشوا خلاص ،، قال معفنين قال 😏

- استنى بس يا استاذه انتى فاهمه غلط خالص ،، العفن ده نوع - أنواع - من الفطريات الموجوده ف كل حته جوا البيت ، بره البيت ، في الشغل ، فى محلات الزهور ، مواقع البناء ، المزارع ،،، الصوبات الزراعية ،. الأبنية القديمة ،، أى حته وكل حته !

** 😱😱😱 وده نخلص منه ازاى ده ياخويا !

- الأول بس تبعدى ابنك عن أى أرض زراعية (حقول) مش مقصوصة (لسه مجمعوش المحصول) ،، أى أكوام ورق شجر او نبات رطب ،، كل ده مصدر رئيسي للعفن MOLDS . لو لابد وحتماً تقصي الزرع او تغرسي فى الجنينة مثلاً يبقى لازم ابنك يلبس Mask قناع على الوجه والأنف !
ولما ترجعوا من بره لازم ياخد دش ويشيل "بذور العفن sporess" من الجلد واللبس يتغسل ، تخيلي!

** ااااه عشان كده كل اما ازور جدى في البلد الواد بيكح يا حبة عينى وياخد ابر مضاد 😥

- احنا لسه متكلمناش خاااالص عن البلاوى اللي جوا البيت واللى ممكن تجمع "العفن" !
 انسي كل اللى فات ومتنسيش ان الرطوبة هى الأب الروحى للعفن - ومن غيرها عمرها ما تعيش!

** تانى بتغلط 👿 وبعدين عدم اللامؤاخذه يعنى ايه رطوبة 😁

- يعنى هوا مليان بخار مياه ،، يعنى الحمام بعد الحموم والمطبخ بعد الطبيخ ،، يعنى الأكل الرئيسي للعفن ،، يعنى السباكة البايظة ال "مسربه" فى الحيطان ،، يعنى الدنيا لما تمطر والمياه تدخل بين شقوق خشب الشبابيك ، وتحت شقوق دهانات الابواب ، شقوق بلاط الحمام او المطبخ،، وبين ورق الحائط اللى جايباه ديكور !

** 😡👿👿😱😱😱.

- يعنى هتشغلى تكيف لو عندك ،، ولو معاكى قرشين ركبى فلتر هواء HEPA أو بلازماكلاستر وخلاص ،، وممكن كمان تجيبي جهاز مزيل الرطوبة Dehumidifier ، وتركبى "مروحة شفط" للمطبخ والحمام تشتغل تلت ساعة بعد الحموم والطبيخ ،، ولو مفيش نفتح الشباك ونجيب مروحة عادية نشغلها ،، يعنى نمسح المياه اللى واقعه فى الحمام والمطبخ اول باول ،، ونغسل سلة القمامة وننشفها باستمرار ،، وتصلحى السباكة البايظة ،، والدهانات اللى بتحوش مياه وراها ،،
وتفتحى شباك البيت ٢-٤ ساعات في اليوم هتطردي الرطوبة تماماً ،، الهدف نوصل تحت ٥٠٠٪ رطوبة فالعفن يموت !!

** 😢.

- متنسيش كمان الكتب القديمة وورق الجرايد اللى وارثاه عن المرحوم مكانة فوق الدولاب القديم وتحت في البدروم بيجمع عفن لا تتخيليه ! اخلصي منه فوراً !

** تمام كده فهمت ان ابنى مش هيتعب خالص ولا يجيلو برد صيف شتا ،، صح 😃😉

- لأ ، طبعاً ،، بس بصراحة كده تبقى قضيتى على ٦٠-٨٠٪ من أسباب الحساسية بخطوات بسيطة وكلها ف ايدك !

** هوا في أسباب تانية 😭😱

- طبعاً يا هانم ، امال حبوب اللقاح والشجر والدخان والبيرفيوم راحوا فين ،، انتى نسيتى كمان القطط والكلاب وحشرة الفرا...

** لأ بقولك ايه ،، استنى اما اعمل الحاجات دي الأول واجيلك تانى عشان كده هنسى 😅

- يعنى اقتنعتى وهتنضفى البيت وتصلحى السباكة 😀

** امال إيه ! ده انا هنضف واجيب ناس تنضف كمااااااااان 😁😁😁

شير أى طفل أو كبير تعبان أو بيكح هيستفيد بإذن الله ❤️

د.أحمد الخطيب .

• غرد
• شاركه
• شاركه
• شاركه
• شاركه

عن الكاتبالمشهد العربي

مقالات قد تهمك