#الحضانة
تعالوا الاول احكيلكوا عن شوية مواقف بشوفها كتير و بعدها نتكلم
موقف 1 :
-ازيك يا مامت جو .. ايه اخبار جو ؟
-مغلبني و الله يا دكتور .. جو عنده سنة و نص و لسه ممشيش و كل تحاليل الكالسيوم و فيتامين د بتاعته سليمة و اديته حقن كالسيوم و فيتامين د و خد قطارة غالية كده لفيتامين د و برضو ممشيش
-طيب احكيلي م البداية كده اتولد تسع شهور كاملين ف الحمل ولا اقل و طبيعي ولا قيصري ..الخ
-هو اتولد قيصري و كامل بس دخل حضانة قعد فيها 10 ايام
-عملتيلوا اشعة ع الحوض بعد ما خرج يا مامت جو؟
- لا يا دكتور
-طب اعمليها و هاتيهالي
-ها الاشعة فيها ايه يا دكتور؟
-الاشعة موضحة التهاب ف مفصل الحوض
-و ده بيخف يا دكتور؟
-للاسف ممكن يحتاج عملية و مش بنقدر نصلح المفصل بشكل كامل . لو كنا لحقناه اول ما خرج م الحضانة كان الموضوع اختلف . عامة تابعي مع دكتور عظام شاطر و هو هيفهمك كل حاجة
موقف 2:
.ازيك يا مامت سلمى
.ازيك يا دكتور
.اخبار سلمى ايه؟
.مغلباني و قالقاني و اللهي يا دكتور . سلمى عندها 3 شهور بس بحسها مش بتشوفني و مش بتعرفني مش عارفة ليه .
.هي دخلت حضانة قبل كده ؟
.اه اول ما اتولدت كان عندها التهاب رئوي و دخلت 20 يوم
.اتحطت ع جهاز تنفس صناعي؟
.اه قعدت اسبوع عليه و 10 ايام ع جهاز سيباب
.طيب روحي لدكتور رمد شاطر و خليه يعمل فحص قاع عين و قوليلي شخص ايه
.انا رحت للدكتور زي ما حضرتك ما قولتلي
.وقالك ايه؟
.قالي فيه مشكلة في الشبكية بسبب الاكسجين اللي سلمى اتعرضتله في الحضانة . الكلام ده صح يا دكتور؟
.للاسف صح
. ومش هتشوف بعينيها يا دكتور؟
.للاسف ده احتمال وارد بناءا ع راي دكتور الرمد اللي هيحدد مدى الضرر و ايه المفروض يتعمل
موقف 3:
-انا زهقت يا دكتور من هيما
-ليه يا مامت هيما ماله؟
-من ساعة ما دخل الحضانة وهو صغير و كل شهر يتعب بصدره كل الدكاترة شخصته حساسية صدر و مش عارفة اعمله ايه تعبت. هو دلوقتي 6 شهور و خايفة عليه م الهوا او التعامل مع اي حد .
-هو دخل الحضانة بتشخيص ايه؟
-التهاب رئوي يا دكتور قعد 11 يوم و خرج
-طيب عملتي ايكو؟ خدت تطعيمات الاضافية الروتا و المكورات الرئوية
-لا معملتش و مخدش غير تطعيمات الصحة بس
-طيب اعمليلي الايكو ده
-ماشي طب و ليه التطعيمات؟
-عشان هو مش عنده حساسية صدر هو عنده بواقي اثار التعب اللي جاله ف الحضانة و تاثيره ع صدره فلازم نحميه بالتطعيمات دي عشان ميتعبش تاني . يلا اعملي الايكو و هاتيهولي
-الحقني يا دكتور الايكو مطلع ثقبين ف القلب و وصلة شريانية . اعمل ايه قولي
-متقلقيش الثقبين صغيرين و ممكن يقفلوا مع الوقت بس الوصلة الشريانية دي قصة تانية مش بتقفل لوحدها . متقلقيش هتابعي مع دكتور قلب و هيشرحلك كل حاجة
-طب و التطعيم لازم ياخده ولا خلاص؟
-ده دلوقتي لازم ياخده 200% يا مامت هيما
-موقف 4:
.ازيك يا مامت سولينا
.قلقانة و خايفة ع سولينا يا دكتور . عندها دلوقتي 6 شهور و مش بتصلب نفسها و حاساها كده مش طبيعية
.ممم هي اتولدت طبيعي ولا قيصري؟ و الولادة الطبيعي طولت؟
.لا هي اتولدت قيصري مش طبيعي . بس دخلت حضانة عشان كان عندها ميكروب ف الدم و قعدت حوالي 25 يوم في الحضانة
.طيب عكلتي اشعة ع المخ بعد ما خرجت؟
.لا . اعملها؟
.ماشي اعملي اشعة مقطعية ع المخ و هاتيهالي
.ها ايه ف الاشعة يا دكتور؟
.الاشعة مطلعة ضمور بسيط ف المخ
.يا لهوي
.ربنا يسترها . هتابعي مع دكتور مخ و اعصاب و ان كان الاحسن كنتي تابعتي معاه بدري
باختصار:
1.اي طفل يدخل حضانة 5 ايام ع الاقل لازم يتعمله اشعة سونار ع مفصل الحوض بعد ما يخرج ع طول عشان مياثرش بعد كده عليه
2.اي طفل يدخل حضانة و يتحط ع جهاز تنفس صناعي او سيباب 5 ايام ع الاقل لازم كل اسبوع دكتور رمد يطمن ع قاع العين ف الحضانة و اول ما يخرج عشان نطمن ع الشبكية بتاعته و نظره
3.اي طفل دخل الحضانة و اتحط ع اكسجين لازم يتعمله ايكو ع القلب و ياخد التطعيمات الاضافية الروتا و المكورات الرئوية
4.اي طفل دخل الحضانة و اتحط ع جهاز تنفس صناعي او سيباب او اكسجين عادي لازم يتعمله اشعة مقطعية ع المخ اول ما يخرج عشان نطمن انه معندوش ضمور في المخ
#ربنا_يسترها
#الحضانة
تحويل كودإخفاء محول الأكواد الإبتساماتإخفاء