سبع سنين يا دكتور و"بيسان" من ساعة ما تمت السنة وهيا مبيعديش عليها أسبوع إلا اما تجيلها سخونية تقعد بالتلات أيام .. وتترمى على الأرض من بطنها اللى توجعها طول الليل .. وترجّع ...
الوزن ١٧ كيلو مبيزيدش جرام واحد ومفيش شهية خاالص ..
والبنت بيجيلها فترات إسهال مجهولة السبب ..
حياتنا بقت عند الدكاترة وكل شوية مضادات حيوية ومش عارفين حل!!! "
- بصى يا مدام ... متقلقيش بإذن الله بنتك هتخف وهتبقى زى الفل ... الأعراض دى متخرجش فى وجهة نظرى عن حاجتين .. يا إما حمى البحر المتوسط - وده الإحتمال الأضعف. يا إما عدم التحمل الغذائى Food intolerence وده اللى أنا شاكك فيه بقوة .
- ............
حضرتك هتعملى التحاليل دى وتشرفيني في العيادة تاني بإذن الله .
- قلقانة يا دكتور 😰
- متقلقيش .. نخل "بيسان " يوشك أن يُثمِر 😀
عدى أسبوع .. شفت التحاليل .. بدأنا خطة العلاج ..
ودى قدامكم الجميلة "بيسان" بعد شهرين فقط علاج .. والله ما أخدت دوا واحد ... منعت فقط القمح ، الطماطم ، المانجا .. طبقاً لخطة العلاج والتحاليل .
"بيسان " زادت كيلو كامل في شهرين - اللى ما زادتش جرام بقالها سنين .
"بيسان" مجاتهاش ولا نوبة حرارة من القديمة ولا ألم بطن وشهيتها اتفتحت بفضل الله .
"بيسان" بفضل الله وكرمه بقت بنت تانية خالص.
* عدم التحمل الغذائى Food intolerence منتشر جداً موجود جداً .. وللأسف .. مجهوووول جداً و underestimated ..
* ده عبارة عن أكل معين الطفل بياكله وهوا أصلاً الجهاز الهضمى مش "مُتَحمِّلُه" مع الوقت بيجرح بطانة الأمعاء ،، يعمل إلتهاب مزمن ،، عسر هضم .. سوء امتصاص .. فقدان شهية مزمن .. عدم زيادة وزن .. وترجيع أو إسهال أو إمساك أو براز ممخط مثلاً و أحياناً في الحالات المتأخرة دم مخفى ثم ظاهر فى البراز .. وبالتأكيد أنيميا مزمنة .
* الفكرة في الموضوع إن النوع ده بالذات من حساسية الطعام مش بيظهر بسرعه ولا بيظهر في الجهاز الجلدى ولا التنفسي يعنى مش طفل يشرب لبن فيظهر حساسية في الجلد ولا كحة مثلاً أو ضيق نفس .. لأ ده بيظهر ويزيد مع الوقت Chronic FPIES .. وبيأثر بشكل مزمن على النمو وأعراضه بتكون بعد ٣ أيام فما بعد ومع استمرار الأكل "المؤذى" بشكل متكرر بتستمر الأعراض اللى "مش دايماً" بتبقى واضحة وبيكون أساسها فقدان شهية مع ألم متكرر فى البطن وعسر امتصاص وهضم .
* تشخيص النوع ده من الحساسية مالوش تحاليل "متفق عليها عالميا" وكل اللى في إيدينا "منع الأكل المشكوك فيه " .. و"إدخاله مرة أخرى" .. والتحسن مع المنع ثم التدهور مع الإدخال بيثبت ١٠٠٪ التشخيص .. كذلك استبعاد جميع الأسباب الأخرى اللى ممكن تجمع الأعراض كلها فى طفل واحد زى أمراض الجهاز الهضمى من التهابات مزمنة وقولون متقرح أو العدوى الطفيلية مثلاً مننساش مرض السيلياك وبعض أمراض المناعة الأخرى شديدة الندرة والإطمئنان على باقى أجهزة الجسم .
* عاوز اقول مش حالة واحدة لا والله والله دى حالات كتير جداً بأخذ التاريخ المرضى المفصل بنكتشف "عدم التحمل" فالحالات فعلاً كتيرة فدي صرخة اهتمام والله بوجهها لكل زملائى الأطباء الأحباب الأفاضل .. الحالات كترت ومحتاجة أبحاث ومحتاجة جهد فى المتابعة والعلاج .. و لو فيه أمهات بيتابعوا معانا في العيادة وقرأوا البوست ده ممكن يحكولكم على تجربتهم .
بعد ما "بيسان" الجميلة رجعت بعد شهرين ..
وبين زيارة بيسان الأولى وهيا مريضة ..
وزيارتها الثانية بعد ما شفاها الله بحوله وقوته لا بأدنى فضل من مخلوق والله ..
لسه فيه أمل ❤️
تحويل كودإخفاء محول الأكواد الإبتساماتإخفاء